ಶುಕ್ರವಾರ, ಸೆಪ್ಟೆಂಬರ್ 6, 2013

ಮೌನದ ಮನವಿ

ಎಲ್ಲಿ ಅಡಗಿರುವೆ ಸ್ವರ
ಮೆಲ್ಲಗೆ ಮರೆಯಾಗಿ
ಕಲ್ಲಾಗಿದೆ ಕೊರಳು
ಸೊಲ್ಲೆತ್ತಲೂ ಬರದೆ

ಮನ್ನಿಸು ಅಸಡ್ಡೆಯನು
ಬಿನ್ನಹದ ಉಪೇಕ್ಷೆಯನು
ನಿನ್ನಿರುವ ಮರೆತು
ಬೆನ್ನು ತೋರಿದ ತಪ್ಪನು

ಮತ್ತಿನ ಮಬ್ಬಿನಲಿದ್ದೆ
ಕತ್ತಲೆಯ ಹೊದ್ದಿದ್ದೆ
ಚಿತ್ತದ ನುಡಿ ಲೆಕ್ಕಿಸದೆ
ಮೆತ್ತಗೆ ಮುಸುಕೆಳೆದಿದ್ದೆ

ಭ್ರಮೆ ಚದುರಿ ಬಯಲಾಗೆ
ಕಮರಿತ್ತು ದನಿ ಟಿಸಿಲು
ಅಮಾವಾಸ್ಯೆಯ ನಭದಂತೆ
ಜಮೆಯಾದ ಕಾರ್ಮುಗಿಲು

ಇಲ್ಲೀಗ ಗದ್ದಲ, ಎಲ್ಲೆಲ್ಲೂ ಸಪ್ಪಳ
ಚೆಲ್ಲಿ ತುಳುಕಿದೆ ಕರ್ಕಶ ರವ
ಒಲ್ಲೆ ಈ ಗೌಜು, ನಿಲ್ಲದ ಮೋಜು
ಮೆಲ್ಲುಲಿಗೆ ಕಿವಿಯಾಗಿ ಕಾದಿದೆ ಜೀವ

ಬಿಕ್ಕುತಿಹೆ ಬೇಡುತಿಹೆ ಪ್ರೀತಿಯಲಿ ಬೈಯುತಿಹೆ
ಸಿಕ್ಕು ನೀ ಬೇಗ, ಕಣ್ಣಂತೆ ಕಾಯುವೆ
ಸುಕ್ಕಿದ ಚೇತನಕೆ ತುಸು ಕಸುವು ತುಂಬುವೆ
ಅಕ್ಕರೆಯಲಿ ಆದರಿಸಿ ಬೆನ್ನಾಗಿ ನಿಲ್ಲುವೆ
(ಅವಧಿ.ಕಾಮ್ ನಲ್ಲಿ ಪ್ರಕಟವಾದ ಕವನ)

4 ಕಾಮೆಂಟ್‌ಗಳು:

  1. ನಸುಕಿನಾ ಮುಸುಕಿನಲಿ..
    ಇಬ್ಬನಿಯ ಮಬ್ಬಿನಲಿ..
    ತೊರೆಯ ತೆರೆಯಲ್ಲಿ..
    ರವಿಯ ರೆಶಿಮೆಯಲ್ಲಿ..
    ಬೆಟ್ಟದಾ ಜುಟ್ಟದಲ್ಲಿ..
    ಓನಕೆಯ ಅ೦ಚಿನಲಿ..
    ಪಸರಿಸಿದಾ ಪೈರಿನಲಿ..
    ಹೆಸರಿಡದಾ ಕ೦ದನಲಿ..
    ದಾಟೀ ಇಲ್ಲದ ಪದ್ಯದಲ್ಲಿ..
    ..ಮೌನದ ಮಾತು..

    ಪ್ರತ್ಯುತ್ತರಅಳಿಸಿ
  2. ತುಂಬಾ ಸುಂದರ ಕವನ ರೇಖಾ ಅವರೆ, ಹೀಗೇ ಬರೆಯುತ್ತಿರಿ.

    ಪ್ರತ್ಯುತ್ತರಅಳಿಸಿ
  3. ಮಂಜು ಅಣ್ಣ, ನಿನ್ನ ಕಮೆಂಟ್ ತುಂಬ ಸುಂದರವಾಗಿದ್ದು. ಕವನಕ್ಕೆ ಕಾಂಪ್ಲಿಮೆಂಟ್ ಆಗಿ ಪ್ರತಿ ಕವನ, ನನಗೆ ರಾಶಿ ಇಷ್ಟ ಆತು!

    ಪ್ರತ್ಯುತ್ತರಅಳಿಸಿ